١٠ حاجات لازم تعملها لو عندك ولد

١٠ حاجات لازم تعملها لو عندك ولد

ابنك هو خلاصة تجاربك و انعكاس لاسلوبك في الحياة

لو ابنك بيكدب يبقي اكيد انت بتكدب قدامه,
لو ابنك جبان يبقي بيشوفك ضعيف و بتفرط في حقوقك.
لو طلع صاحب موقف و رأي بقي طلع لقي ابوه صاحب موقف و رأي و مش مطاطي 

التربية مش تعليمات و ارشادات بقدر ماهي قدوة و افعال
ماينفعش تكلم ابنك عن الصلاة وانت مابتركعاش ..مش هايصدقك

لازم تفهم ان الحديقة الجميلة ليست بطول اسوارها ,بل بجمال زهورها

خليك قوة حسنة لابنك عشان يقلدك
قديما قال رجل لابنه "احذر يا بني كي لا تقع في الحفرة"
فاجابه الغلام لا تقلق يا ابي فانا علي خطاك اسير

عشان كدة هقدم لك اهم عشرة نصائح تساعدك في تربية طفلك :

1-القدوة الحسنة

اللي عايز تعمله ليه , خلي سلوكك و افعالك و كلامك سفراء ليك يوصلوا له المعاني و القيم اللي حابب تغرسها فيه

الطفل ذكي و بيتعلم بالتقليد و بيحفظ ما يشاهده امامه

فاحذر ان يراك فيما يسيء اليك 

ابنك حسب ما بتزرع فيه و حسب ما بيشوف فيك و منك من اخلاق و قيم و افكار
بص علي حوادث التحرش في مجتمعنا و شوف الاسباب و الدوافع، هتلاقيها كلها راجعة للبيت و التربية

2-احترم رأيه

علم ابنك من صغره يكون له رأي و احترمه..

شاهد الفيديو التالي:

كيفية التعامل مع الطفل العنيد

 

كلمه خد رأيه فضفض معاه حتي لو لسة صغير و مش فاهم .......

هو اكيد هيحس بيك و بمكانته جواك ..
انت بكده, بتعمله شخصية من صغره و بتخليه يشعر بدعمك ليه

3- قويه

علمه يحافظ علي حقوقه ,لما يلاقيك انت مش بتفرط فيها.
لو حد اعتدي عليه او ظلمه خليك في ضهره
و اوعي تعمل مشغول او مش فاضي.
اعمل الي عليك و خليك معاه للاخر

و بلاش تعلمه يمشي جنب الحيط ,
عشان هايجي يوم الحيط هايقع عليه و محدش هايحس بيه 

و الاهم

اوعي تربيه بالقسوة و الضرب و الاهانة 
عشان مايطلعش منطوي 
و فاقد الثقة في نفسه و في الي حواليه 
العصايا عمرها ما بتخلق راجل 

4- اسنده

مهما حصل لازم تكون جنبه في اوقات فرحه و نجاحه
و في اهم لحظات حياته

اوعي تخليه يدور علي بديل ليك ,
وتبقي انت بالنسبة له مجرد بنك و مصدر للفلوس فقط

5-احذر المقارنة

اوعي تقارنه بحد تاني
و بلاش الجمل اللي من نوعية
ياريتك زي اخوك الكبير او ابن فلان ,عشان بدل ما هيقدله , هايكره و يكره روحه

مش شرط عشان ابنك عشان ماطلعش من الاوائل
يبقي فاشل و تكسر نفسه بالاهانة و المعايرة
يكفي انك تحس انه تعب و عمل الي عليه بجد
شجعه و حفزه و طبطب عليه
لانه اكيد المرة الجاية هينجح

6- عمله يحترم بنات الناس

تربية راجل سوي يحترم بنات الناس و يصونها، دي حاجة مش سهلة،

علمه ان الرجولة مسؤلية و احتواء مش صوت عالي و شنب 

علمه ان اختك،مراتك ،بنتك يعني عرضك و شرفك 

علمه ان كل بنت ف الشارع هي زي عرضك، و التعدي عليها يعني هتك عرضك انت 

7- خده صاحب ليك

قرب منه و صاحبه
اقضي معاه اكبر وقت ممكن
و اوعي تحرمه منك بحجة الشغل و الجري علي لقمة العيش و تحقيق طموحاتك

اخلق بينك و بينه مواقف مشتركة تسعده بقربك

مقال قد يهمك :

التعامل مع الطفل العنيد / ابني عنيد و مش بيسمع كلامي

8-خليه يحب وجودك

خلي وجودك في البيت يكون باعث للفرح , مش لحظات نكد و رعب
ماتخليهوش يتمني لحظة الحرية انها تكون في غيابك

9- المسئولية

علمه المسؤولية من صغره
و بلاش تطلعه اناني و تقولش لسة بدري عليه
اديله بعض مسؤوليات في البيت

اسمع رأيه عشان لما يكبر يبقي واقف علي رجليه
مش مهزوز وضعيف و فاقد الثقة في نفسه 

و الاهم ،علمه يتصرف بمسؤولية و احترام لحريات و حقوق الغير، عشان يطلع راجل سوي، مش منحرف او مؤذي لغيره

10-طول بالك عليه

ابنك ليس خصما ولا ندا لك
فلا داعي ان تفسر كل تصرفاته بالتحدي والندية
قرب منه و افهمه

استمع اليه كإنسان له كيان وليس منضدة او كرسي في البيت !
قد يخطئ في اختيار ألفاظه او اُسلوب تعبيره عما يريد او ما لا يريد
تحمله فإنه لا زال يتعلم .. إنه لا زال محتاج إليك .

في النهاية

ما اكثر الذكور في محتمعنا لكن قليلا ما هم الرجال

ربي راجل ينفع نفسه و ينفع بلده احسن الف مرة ما تخرج للمجتمع شخص منحرف او متحرش او مضطرب الشخصية يطلع عقده و كلاكيعه علي خلق الله