الزم حدودك - فن رسم الحدود في العلاقات
الحدود بتغيب لما بتلقى روحك خايف تقول " لأ " إتقاء شر إلي قدامك أو رغبة في الحفاظ عليه .
الحدود بتغيب لما بتلاقيك تايه من نفسك و مشاعرك و تقديرك ليها بقت مرهونة بنظرة الناس ليك .
الحدود بتغيب لما بتتحرم من حقك في الخصوصية و الاختيار او الحصول علي مساحة للتنفس .
الحدود بتغيب حال إستمرارك في تلبية طلبات الاخرين علي حساب صحتك و طاقتك و مشاعرك
و استمرارهم في استنزافك دون اي تقدير لظروفك
ما قد يدفعك في النهاية نحو الشعور بمزيد من السخط و الاستياء لعدم معاملتك بالمثل او حصولك علي التقدير المناسب .
الحدود هي السور العالي إلي بيحمي ويحافظ على حياتك و مشاعرك و ممتلكاتك من تعديات الغير .
الحدود انك تقول " لأ " لما يكون ضروري انك تقول لأ .
الحدود هي إشارات تحذير للغير أن هُناك شيئا يفوق إحتمالك و أن لديك حدود يتم التعدي عليها
و أن عليهم التنبه لذلك , و مقابلة ردك ببعض من التقدير و التفهم
شاهد الفيديو التالي:
عارف يعني ايه تبقي شخص حدوده دايبة؟
- عارف يعني ايه تقضي سنين من عمرك و انت تايه مش عارف جاي منين و لا رايح فين
- عارف احساس انك تحس بمرارة الخذلان من اللي حواليك بعد ما عشت سنين متكتف برضاهم عنك
- عارف يعني ايه تبقي حدودك النفسية هشة لدرجة انك بتتهز و تصدق اي كلمة تتقال فيك و عليك حتي لو مش صح
- عارف يعني ايه تخاف تقول لأ و لما تقولها تتقلب الدنيا عليك و ساعتها ماتجنيش من وراها غير القمص و التأنيب
هو دا بقي المعني الحقيقي للحدود الذائبة او ال Porous boundaries
- يعني تقضي سنين من عمرك مغروز في حياة اللي حواليك و مشاكلهم و احلامهم علي حساب روحك و حياتك و احلامك
- يعني تفضل مبقي اللي حواليك علي روحك لدرجة ممكن تسبب لك الاذي
- يعني تفضل متعلق بيهم لدرجة ان تقديرك لنفسك و اللي بتعمله يبقي مربوط برأي و تقييم اللي حواليك
عايش طول الوقت قلقان متوتر مش عارف تبقي حر ,
مش عارف تاخد خطوة بره الصندوق الضيق احسن يتكسر علي دماغك
حتي لما بتيجي تتكلم و تعبر عن اللي جواك ,
بتتكلم بحرقة و من كتر توترك الكلام بيطلع متلخبط مش مترتب ,
و نتيجته انهم بيتصيدوا لك اي كلمة غلط او معني مش مقصود عشان من تاني تبقي انت اللي غلط و يتتقابل باللوم , و تتلقب الترابيزة علي دماغك و يضيع حقك يا مسكين
و هيصبح كل اللي بتقدمه و اللي بتعمله حق مكتسب لا يستوجب شكر و لا تقدير
استمرارك بالشكل دا هو بمثابة موت بالبطئ , استهلاك لطاقتك و مشاعرك و حياتك لصالح الغير
انت مش مبسوط , مش مرتاح و لا حاسس ان اللي بتعمله و بتقدمه بيحقق لك الامان و الاستقرار النفسي الي ضحيت بكتير عشان تحققه
شاهد الفيديو التالي:
انا شخصيا كنت زمان شخص متنازل عن حقه و كسوفي و سكوتي كان مسبب لي الاذي و الضيق كنت ماشي جوه الحيط لحد ما الحيط نفسها وقعت علي دماغي
و ضعيت سنين من عمري في التوهة و الخذلان لا بعرف ارد و لا اخد حقي و لا بعرف اقول " لا
دايما متاح و دايما اي كلام سلبي و نقد سئ النية بيأثر فيا و يفقدني ثقتي في نفسي
مش قادر اتحمل مسئولية ترتيب حياتي و علاقاتي و وضع كل حد في حجمه الطبيعي
و النتيجة, اني في لحظة بقيت اتعب جمسانيا و نفسيا و حياتي كلها بقت بترجع لورا
تلقي نفسك بتجز علي سنانك - بتاكل ضوافرك من الغيظ - يجيلك السكر عادي ...ما انت تستاهل
انا عشت و مريت بكل الي انت مريت بيه و عانيت منه و عرفت اتعامل معاه و اتجاوزه لحد ما بقيت اعرف ارسم حدودي كويس لكل العالم و أولهم نفسي و اتعلمت احترمها و احميها و اصدقها
و صبرت لحد ما الكل اتعود و صدقها و احترمها و دا ساعدني جدا اني اعيش علاقاتي بشكل صحي و طبيعي من غير عشم و لا شحتفة و لا استغلال او سوء فهم
كلمة لأ , احيانا كتير بتكون كلمة " لأ " حماية للعلاقات و مؤشر لجودتها
كلمة لأ الي بتقولها عشان تمنع التجاوزات و تفرمل الانتهاكات دي هي الي بتخليك كبير و غالي في عيون الي حواليك
كل ما تكون دايما متاح متنازل صامت متخازل كل ما بتنزل في نظرهم و تهون عليهم
اقرأ المقال التالي:
محتاج تعمل تقييم للحدود الذائبة دي و تعمل عملية اعادة ترسيم للحدود بشكل صحي و طبيعي
محتاج تضع كل واحد في حجمه و في مكانه
محتاج تعيد بناء و ترميم حدودك الداخلية اللي بتتضمن افكارك و قناعاتك و قيمك الي بتشكل سلوكك و تصرفاتك مع الغير
حدودك الداخلية لما تكون قوية و متينة هتساعد علي تكوين حدود خارجية صلبة واضحة تمكنك من التفاعل مع من حولك علي اسس من الاحترام و العدالة
- هتقدر تعيد بناء وعيك الذاتي و تقديرك لنفسك هيكون نابع من جواك و احترام الاخرين ليك هينبع من احترامك لذاتك
- هتقدر توفر المساحة و الوقت لاهداافك و احلامك و حياتك و هتقدر تحمي مساحة الخصوصية بتاعتك بدون كسوف او خجل
- هتقدر تقول لأ لما تشعر انك محتاج تقول لأ بطريقة تحافظ بيها علي نفسك و تحافظ علي احترامك للاخرين بدون عدائية او بغضاء
أحيانا كتير كلمة " لأ " الي بتقولها دي بتكون مصلحة ليهم و ليك
عشان بتحافظ علي وجودك في حياتهم و انت في احسن حالاتك
و بتحافظ علي امتنانك ليهم و تقديرك لاحترامهم لحدودك فتبذل المزيد من عطائك برضا و شغف
ليست هناك تعليقات
إرسال تعليق