التعامل مع الشخص الناقص

التعامل مع الشخص الناقص 

صفات الشخص الناقص:

الانسان الناقص دا بيكون شخص فاضي من جوة , عنده احساس شديد بالدونية و عدم الرضا , تقديره لذاته متدني جدا
احساسه الشديد بالنقص بيخليه يطلع عقده و كلاكيعه علي الناس من حوله

سماته:

• مش بيعرف يشوف حاجة حلوة و لا بيحب يسيبها حلوة كما هي

• حسود و الحسد واكل قلبه من جوه و دايما بيقارن و عينه من اللي في ايد غيره

• دايما بيسعي لتشويه كل شئ جميل و كل حد ناجح و كل بذل و تعب , عشان يتوافق مع القبح اللي جواه - فلا يشعر ان احدا افضل منه

• سعيه الدائم انه يقلل من قيمة الاخرين و تسليط الضوء علي عيوبهم هو اللي بيحقق له التوازن من جواه

• يبقي عامل حبيبك و هو عينه من حياتك و مستني لك علي غلطة

• عمره ما هايصون المعروف و لا يحفظ الجميل , لأنه بتاع وقته و مصلحته و بس

• اتفرج عليه في وقت الشدة و الضعف و هو بيستغل ضعفك عشان ياخد مكانك او يتحجج بالاعذار عشان يتخلي عنك في شدتك

• هو جنبك مستفيد في وقت قوتك و نجاحك , لكن وقت ما بتقع بيكون اول الراحلين

• مش بالشكل و لا باللبس الغالي او المستوي الاجتماعي , النقص في النفوس مش في المظاهر - و الفقر فقر الاخلاق و ليس فقر الاموال فقط

كيف اصبح هكذا , شخص ناقص؟

• الشخص الناقص , شخص اتربي عالحرمان و قلة التقدير و عدم الاحترام

• شخص لم يتعلم معاني المسئولية و الشهامة و الجدعنة

• شخص اتربي علي الطمع و عدم الرضا و القناعة

لذلك لكي تتعامل مع الشخص الناقص دا لازم تتصرف عالاتي:

• اوعي تفتح له المجال يدخل لنفسيتك و يدمرها بكلامه السلبي المحبط

• اديله علي دماغه و حجمه و اوعي تديله اكبر من حجمه في حياتك

• قلل التواصل معاه و خليه في اضيق الظروف

• حافظ علي مسافة كافية امنة في علاقتك بيه , و اوعي تديله سرك و لا تطلعه علي نقاط ضعفك

• قلل عشمك فيه و خلي علاقتك بيه سطحية ,و علي قد ما تقدر خفض سقف توقعاتك تجاهه

• اياك ان تشعر بالحرج او الخجل من ان توقفه عند حده او تظهر له الحزم و الشدة اذا تطلب الامر , فهو شخص لن يراعي سكوتك او خجلك , بل سيعتبر ذلك اشارة للتمادي في مزيد من الاذي ضدك

نصيحة مهمة:

• خليك دايما واعي بسلوك الناس من حولك, و لا تتغافل عن اي شئ يسبب لك الاذي

• حدودك الشخصية الصحية هي الي هاتحذرك لو حد حاول يتلاعب بيتك او يستغل مكانه في حياتك او يتعدي تلك الحدود

• اخلق دايما توازن في حياتك من خلال علاقات صحية ايجابية تدعمك و تحميك و تعزز ثقتك بنفسك ,

• احذر انك تقفل حياتك علي علاقة واحدة بس تكن هي نافذتك علي العالم , و بالتالي قد يعمل طرف هذه العلاقة علي استغلال ذلك لتعزيز مصالحه و رغباته بما يضرك انت