صديقتي خطفت زوجي
مش عارفة يعني هي صاحبتي اللي لفت من ورايا و خطفت جوزي و الا جوزي اللي عينه زايغة بس انا خديعتي مزدوجة
ازاي ماكنتش شايفة و لا دارية باللي بيجري من ورا ضهري
صاحبة عمري اللي فتحت لها بيتي و امنتها علي حياتي ازاي تخوني بالشكل دا
و جوزي اللي قايدة له صوابعي العشرة شمع ازاي يعمل فيا كدة ؟ و مع اعز صحاباتي ؟
كنت بشوفهم بيهزروا مع بعض قدامي و عالواتساب و بقول عادي , اختي و حبيبي
تكلمه ينزل يعمل لها مشاوير و يخلص لها مصالح , اقول لازم طبعا دا واجب علينا
يختار لها هدية عيد ميلادها و انا ابقي فرحانة انه بيهتم بصاحبتي و بحياتي
عمري ما حسيت ان في حاجة غلط و لا اديت خوانة
اعمل ايه؟
الرد علي الرسالة :
الحقيقة ان ليكي حق تتصدمي , بعد الخيانة المزدوجة دي , سواء خيانة الزوج او خيانة الصديقة
لكن علينا اننا نفوق من صدمتنا بسرعة و نراجع اللي حصل و نحدد دورنا و مسئوليتنا بوضوح و من غير ما ندفن راسنا في الرمل
اكيد غلطنا
اه غلطنا لما ادينا الامان بزيادة و لم نضع حدود واضحة للعلاقة مع الصديقة او مع الزوج
غلطنا لما صدقنا ان الناس كلها ملايكة و عندهم قيم و اخلاق
غلطنا لما شفنا الغلط قدام عنينا بس تغافلنا عنه و اتعاملنا معاه بسذاجة و عدم حرص
غلطنا لما وفرنا البيئة المناسبة لمكونات الغلط تتشكل بدون ما ناخد خذرنا
غلطنا لما ما ركزناش بكفاية و حافظنا علي حياتنا من العيون اللي مرقدة لنا و طمعانة فيها
اوعي تنكسري او تخلي الازمة دي مهما كانت شديدة توقعك
هي درس , مر شوية و مؤلم بس هايعلمك و يزود خبراتك
اوعي بس تفقدي ثقتك في الناس لان مش كل الناس زي بعض لا في الخير و لا في الشر
مش عايزين نغلط نفس الغلطة بشكل عكسي , و نتحول من الثقة المفرطة للشك المفرط
لكن في النهاية لا امان مطلق
الخاين مايتزعلش عيله
لعله خير و لو كان خيرا لبقي و دام
ليست هناك تعليقات
إرسال تعليق