كيف اتعامل مع اهمال زوجي لي؟

كيف اتعامل مع اهمال زوجي لي؟

كيف اتعامل مع اهمال زوجي لي؟

انا جوزي مهملني ومش قادر يهتم بيا ولا يديني وقت خالص وبيننا مشاكل كبيره بسبب الموضوع دا ..
علطول مشغووول ونافر من البيت وبيهرب..وانا عندي طفلين وشايله كل شي لوحدي ..

هو بيقوم بواجباته الماديه تجاهنا لكن معنويا مفيش ..مفيش بينا كيميا ولا تفاهم ومختلفين وهو دا السبب الرئيسي
تعبت ونفسي الاقي حل , وجربت كل حاجه و برده مفيش فايدة
علي طول متضايقه بسببه ولما اتكلم معاه في حقي .. بنتخانق و يقولي انتي ضاغطه عليا وملاحقاني , وانه بيعند وينفر اكتر بالاسلوب دا ..

للأسف ولا راضي يسيبني ولا راضي يعيش معايا عدل , لحد ما كل واحد فينا بقي في وادي, ومحدش فينا طول اليوم بيعرف حاجه عن التاني
اعمل ايه؟

الرد علي الرسالة :

شوفي يا سيدتي الفاضلة

مشكلة حضرتك هي حال ازواج و زوجات كتير , مفتقدين لبوصلة التفاهم و السعادة مع بعض , و العلاقة بينهم عبارة عن صراع او كر و فر و احيانا كتير بتتحول الي علاقة روتينة مملة بين اتنين موظفين بدرجة زوجين
لدرجة انه بعد فترة من الجواز بتحس انك غريب عن الشخص الي انت عايش معاه تحت سقف واحد
مفيش بينكم لغة مشتركة و التواصل بينكم بقي صعب
قاعدين جنب بعض و بينكم ١٠٠٠ حاجز
مفيش حاجة بقي ليها طعم
بقيتوا مجرد موظفين برتبة زوجين
كدة كدة الحياة ماشية و كدة كدة الشغل و البيت و العيال موجودين
بس في حاجة ناقصة
الحياة ميري اوي..جد اوي.. خالية من التعبير والمودة المعلنة
خالية من الكلمة الحلوة
كلمة الشكر .كلمة التقدير .كلمة الحب .كلمة اﻻعجاب . كلمة المساندة
حتي ادق تفاصيل العﻻقة بتتم بشكل روتيني في الضلمة ..كتيمي من غير كلمة حلوة و ﻻ تعبير عن الاستمتاع و الاعجاب.من غير ما تقول "الله"

انا بس عاوز اوجه رسالتين - الاولي ليكي و الثاتنية  الي زوجك:

الرسالة الاولي ليكي و لكل زوجة تعاني من اهمال الزوج لها :

حاولي تراجعي شوية الطريقة اللي بتعبري بيها عن احتياجاتك و الاسلوب اللي بتتواصلي بيه مع زوجك
مش يمكن طريقتك في الكلام تكون سبب في ضياع حقك؟
مش يمكن اسلوبك في الرد عليه او في عرض مشكلتك سبب في زيادة المشاكل
مش برمي عليكي الغلط و لا بحملك مسئولية خلافاتكم
و لكن جايز لو عرفتي تحلي مشكلتك يكون دا سبب في مزيد من القرب بينكم
الردود الناشفة و الندية و جو ابلة الناظرة دا عمره ما يكون سبب في سعادتك
عشان ليس الذكر كالانثي - زي ما الست ليها دخلة و اسلوب لكسب قلبها
الراجل برده ليه دخلة و اسلوب لكسب قلبه
بعيدا عن جو رمي الاتهامات علي بعض
و دفن الرؤس في الرمال , مهم نعرف الغلط فين عشان نصلحه
اعتبريها نصيحة اب او اخ كبير عايز مصلحتك و بيكلمك من قلبه لوجه الله
و لو 
لو مهتمة تطوري نفسك و تصلحي بعش الاخطاء الكارثية في ردك , بدون ما احساس الضحية يغلب عليكي

عايزك تشوفي الاخطاء التسعة في التعامل مع الرجل الي موجودين في المقال التالي


رسالة الي زوجك و كل زوج غير مستقر في العلاقة الزوجية :

يا ما ناس كتير عايشة مع بعض تحت سقف واحد عشان السنين تعدي من غير احساس و لا مودة .

زي المطلقين بالظبط بس في روابط اقوي مخلية العلاقة مستمرة
المشكلة في النوع الي مش قادر يستحمل
في رجالة كتير عاملين مش واخدين بالهم او واخدين بالهم و مش عارفين يتصرفوا

اوعي تفتكر ان جريك علي اكل العيش فقط هيشفع اهمالك ليها او هيعوضها عن احيتاجات تانية
من ضمن الحاجات الاساسية للانسان-الحاجة للتقدير-
يعني الاهتمام و الكلمة الحلوة
اهمال مشاعر الزوجة و تجاهلها و الانشغال عنها

البخل عليها بالكلمة الحلوة و التقدير لتعبها
تجاهل اشعارها بانوثتها و تدليلها
بتتكسف بقي ..متكبر..مستخسر..مش عارف..مشغول
النتيجة واحدة
في بيتك قنبلة مشاعر موقوتة..سهل العبث بها و تفجيرها قد تنفجر بوجهك في اي وقت

جوع المشاعر اصعب من جوع البطون
الاهمال هو السوسة الي بتاكل اركان اي بيت بالبطئ هي اﻻهمال
اﻻهمال مش شرط يكون متعمد
اﻻهمال ملوش مواعيد و ﻻ مدة محددة

وعلي العكس

الاهتمام مش مكلف و اﻻ محتاج تفرغ
اﻻهتمام ممكن يكون بكلمة حلوة او موقف تقدير لطيف
اﻻهتمام انك تحس بوجعه و فرحه و تبقي جنبه
اﻻهتمام انك تعمل حاجة بيحبها شريكك من غير ما يطلب
اﻻهتمام انك وسط مشاغلك الكتير تفتكر شريك حياتك و تسأل عليه و لو دقيقة أو بكلمة
و خد بالك

الكلمة الحلوة هي الماء الي بيروي ارواحنا زي الشجرة الي بتكبر و تفرع و ضلها يغطي الكل
الكلمة الحلوة بتتقال في كل وقت و في اي مكان من غير خوف وﻻ كسوف
الكلمة الحلوة بتتقال بثقة.من القلب ..مش بتتشحت وﻻ تتشد من البق عافية او محايلة او سد خانة
الكلمة الحلوة بتبان علي الوش و في نبرة الصوت .بتتحس
الكلمة الحلوة بتصبر . بتقوي. بتسند. بتداوي

بلاش نبخل علي بعض بالكلمة الحلوة..... بلاش نأجل الكلمة الحلوة
خليها تتقال في وقتها قبل ما تبرد و تفقد قيمتها و طعمه

المقال التالي يهمك جدا:

6 أشياء تريدها المراة من الرجل 

الخلاصة:  ان الاهتمام هو معاملة

ابتسامتك في وجهها ولتقول لها (تسلم إيديك) وهذا يكون أكبر كنز عندها في الدّنيا...
إتّقوا الله في نسائكم ... وعاملوهنّ كما تُحبّون أن تُعامل بناتكم ...
وكما أنَّ ابنتك غاليةٌ عليك، فإنّ زوجتك غالية أيضاً عند أبيها وكانت (أميرة) مُدلَّلة ببيت والدها ...
خذ بوصيّة حبيبك المُصطفى 'صلَّى الله عليه وآله وسلَّم': "أوصِيكم بالنِّساءِ خيراً،" وحين قال : "رِفْقاً بالقوَارِير"، وحين قال : "خَيْرُكُمْ خَيْرُكُمْ لِأَهْلِهِ وَأَنَا خَيْرُكُمْ لِأَهْلِي". ...
اتّقوا الله لتسعدوا وتهنؤوا بحياتكم ... لا توجد حياة تعيسة ؛ ولكن يوجد من أتعسَ نفسه

ليست هناك تعليقات

إرسال تعليق