اخت جوزي خربت بيتي
انا عندي 28 سنه متزوجه ومعايا ولدين , جوزي بيشتغل في محافظة تانيه
بينزل اجازه كل 20 يوم
جوزي ليه اخت وحيده مالهاش غيره عندها 24 سنه, ويعتبر جوزي اللي
مربيها لأن حمايا وحماتي ماتوا وهي كانت في سن 5 سنين
المهم ف يوم وهو ف شغله أخته بعتت له ريكورد ع الواتس بتعيط فيه وبتقولو مش قادره اتحمل العيشه مع جوزي وأنه بيضربها كتير هو وأمه, بعدها جوزي اخد اجازه واول بيت دخله كان بيت أخته حتي مجاش يغير لبسه وحتي بدون ما يفهم اللي حصل اتهجم علي جوز أخته اول ما شافه ونزل فيه ضرب لما عمله عاهات مستديمه وطلق أخته منه وجابها تعيش معانا ف البيت هي وبنتها
ف انا بصراحه بعد فتره مبقتش عارفه اخد راحتي ف وجودها, ف طلبت من جوزي
يشوف ليها شقه جنبنا وتعيش فيها
ف هو رفض وقال اختي مش هتطلع من هنا الا مع عريسها وده اصلا بيتها قبل مايكون
بيتك وكلام من ده
المهم سيبته فتره وبعدين فتحت معاه الموضوع تاني , بس المره دي هددته بأن يا
انا يا هي
ف هو قالي " علي الطلاق ما انتي قاعده فيها" , واتصل علي بابا وقاله
تعالي خد بنتك بدل ما ارميهالك ف الشارع وقفل ف وشه
وبالفعل بابا جه وروحت معاه بس جوزي اخد مني العيال ف انا حكيت لأهلي اللي حصل
بيني وبينه غلطوني وبابا فضل يزعقلي ويقولي احمدي ربنا أنه ماضربكيش دي أخته
مستحيل يرميها بالشكل ده
بعدها بابا كلم جوزي عشان أساس يرجعني بس جوزي قاله بنتك عايزه ترجع ترجع انا
مش هاجي ليها مخصوص بس قبل ما تيجي فهمهما أنها لو فتحت الموضوع ده تاني
هطلقها
طبعا انا كرامتي كده اتهانت , ف قولت لبابا اني مش هرجع وصممت علي كده , وعدي
5 شهور ع الحال ده
كل اجازه ليه بيبعت السواق ياخد الولاد يقضوا معاه الاجازه , وكمان جاب شغاله
لأخته تعيش معاها عشان متبقاش لوحدها
لحد من أسبوع بالظبط جوزي نزل ع الفيس صور خطوبته علي واحده تانيه ماكنتش مستوعبه اللي انا شايفاه ف بابا كلمه عشان يفهم من جوزي اللي حصل ف جوزي يرد بمنتهى البجاحه ويقوله انا استنيت بنتك كتير وانا ليا طلباتي ولو عايزه ترجع شوفها تاخد شقه بره ولا تقعد مع اختي ولو عايزه تطلق مافيش اي مشاكل ومتكلمنيش ف جوازتي التانيه عشان كلها شهر وهااتتم فكروا و ردوا عليا
تعليقي علي الحكاية
الله يكون في عونك , علي قد ما انا متعاطف معاكي لانك وقعتي مع شخص قد يكون مرتبط باخته ارتباط مرضي او انه متعاطف معاها بشدة نتيجة انها يتيمة منذ صغرها و دا جعله لا يدرك الواقع بحكمة و لا يزن الامور كما تحب ان تكون حتي انه لم يعرف كيف يحتويكي او يحل مشاكل اخته بحكمة بدون ما يتسبب في طلاقها
و انتي للاسف لم تدركي دا و اتصرفتي بدون دراسة للامر او تحليل لطبيعة العلاقة بينهم و حطيتي نفسك في كفة و هي ف كفة ، و النتيجة انه تهور عليكي انتي
الله اعلم بطبيعة علاقتك بأخته و اللي دار بينكم في البيت بس واضح ان الامور قلبت معركة و تنافس .
كان لازم تتصرفي بذكاء اكتر و انتي شايفة انه مبقيها علي الكل , و العلاقة بينهم غير طبيعية
اهلك للاسف رغم انهم مكانوش عايزين يخربوا بيتك بس موقفهم كان ضعيف و قللوا
منك و هو استقوي عليكي و عليهم
ربنا يعينك , و فكري في اللي جاي من حياتك , لأن العلاقة مش زوج زي دا علاقة
بلا امان
في النهاية , المشكلة دي الكل اتصرف فيها غلط مع اختلاف درجات الخطأ و المسئولية , و النتيجة بيت بيتخرب و اولاد بتتشرد بسبب سوء التصرف و العناد
ليست هناك تعليقات
إرسال تعليق