انا مش مبسوطة مع جوزي - حاولت اتطلق مش عارفة , أعمل ايه؟
انا متجوزه من 3 سنين ومعايا بنت و الحمد لله بس مشكلتي اني طول فتره الجواز دى
وانا حاسه انى غريبه و مش مبسوطة و اوقات كتير بقول لنفسي مين ده و وافقت
عليه ازاى ؟
هو عنده عيوب مش قادرة اتقبلها وده اللى خلانى كل يوم ابعد عنه اكتر - و كل
مرة يقولى هتغير ومش بيتغير
علي فكرة أنا واجهته بكل اللى تاعبنى وطلبت الطلاق كتير و برده مفيش فايدة, كل
مره بيرفض
انا فعلا حاسه بالقهره من الجوازه دى , وف كل مره بيحاول يقرب منى , جسمى
يترعش وافضل اعيط وهو بيلاحظ انى ولا مره كنت عايزه الموضوع ده , وافضل اتحجج
كتير واعمل نفسى تعبانه يا اما اصحى بنتى تقعد تلعب معانا
اتكلمت مع مامتى قالتلى حرام عليكى , هو جوزك شرعى وانتى اللى هتتحاسبى
وهتتلعنى وبفضل اجى ع نفسى بس بحس نفسى روحى بتتسحب منى ومش بقدر اخد نفسى
ويغمى عليا
ده غير انه بخيل جدا معايا , ع الرغم انه ما شاء الله بيقبض كويس ومرتبه بيعدى ال 10 الاف ’ بس ولا ف مره يقولى محتاجه فلوس ولو طلبت حاجه يقولى خليها بعدين ويخلينى اصرف ع نفسى م فلوس اهلى لانى مش بشتغل وبيدنى مصروف بيت 2000 ج ولو اشتريت حاجه يجيب ورقه وقلم ويقولى جيبتى اىه وبكام وفضل كام من الفلوس ولو فضل 10 ج ياخدهم مني
فعلا انا مش عارفه اكمل بس هو فعلا مش سايبنى حتى اتنفس , و لو روحت
مشوار ممكن الاقيه اخد اذن من الشغل لان شغله قريب مننا واتفاجئ بيه ف المكان
اللى انا فيه , يقولى مش عارف اسيبك لوحدك , حتي لو هودي بنتي للدكتور برده
يعمل كده , يعرف انا فين والاقيه قدامي.
واجهته قولتله انت بتشك فيا وف تصرفاتى ؟ يقولى لاء. اصيل مش مقتنع ازاى تكونى
ف مكان وانا مش فيه
طب وبعدين ؟حد يدينى حل لان كده واضح ان مفيش طلاق وواضح انى هموت او هتشل وانا لسه صغيره انا عندى 26 سنه وهو 30 يعنى اجمل ايام حياتنا بتنطفي
انا مش بفكر فى حد تانى ولا حد غيرو انا الحمد لله م بيت محترم جدا ومش من نوع
البنات اللى ممكن تكلم حد تانى , انااصلا ماحبيتش قبل كدة ولا ارتبطت الا بجوزى
ده ومعرفتش لا حد قبله ولا بعده
بالعكس انا نفسى اعيش معاه مرتاحه واربى بنتى كويس ف وسطينا, لانها متعلقه
بباباها جدا والحمد لله انا ملتزمه فى صلاتى وقرأه القرآن وعملت عمره قبل
الجواز فا اكيد مش هغضب ربنا , ولو حتى اطلقت عمرى ما هفكر ادخل رجل غريب علي
بنتى واجى على نفسيتها ابدا
تعليقي علي الحكاية
الحقيقة انها حكاية زي حكايات كتير من حكايات الازواج و الزوجات اللي بيبقوا
عايشين مع بعض تحت سقف واحد زي المتطلقين او موظفين بدرجة زوجين , حياة
روتينية وظيفية مملة خالية من الشغف و المودة
كل واحد شايف الدنيا من زاوية واحدة بس او اننا نركز جدا مع عيوب بعض ومش
شايفين اي نعم او جوانب اخري طيبة في حياتنا لحد ما تتبيني بينا جبال الصمت و
الاهمال نتيجة نيران الاستياء التي بتاكل في قلوبنا
نصيحتي ليكي
تواصلي مع معالج زواجي او متخصص في العلاقات الزوجية يقدر يفهم منك تفاصيل اكتر تخص علاقتكم مع بعض و جوانب شخصية كل طرف فيكم , و حاولي تقنعي زوجك انه يروح معاكي لأن دا الافضل ليكم لو عشان تعرفوا تكملوا مع بعض, كما المتخصص هايقدر يساعدكم تغيروا نظرتكم للامور و يخلق بينكم جسر من التواصل اللي يساعدكم تتفاهموا مع بعض بدل العيشة الي كلها غصب و عافية و معاملة من غير نفس دي .
حاولي بس تخرجي نفسك من مربع الشخص الساخط المكره اللي حاسس انه مغصوب و غير راضي , لخانة الشخص اللي بيبذل و يجتهد لانجاح العلاقة بالطرق الصحيحة و الوعي و التواصل الايجابي , اللي يزيل الخلاف و سوء الفهم بينك و بين شريك حياتك, نفورك منه بيخليكي بعيدة عنه و مش فاهماه صح و دا يمكن اللي بيخليه يتصرف كدة معاكي
او كل واحد يروح لحاله بدل ما تعيشوا بنتكم في علاقة لا فيها حب و لا مودة و لا احترام , و كله هاينعكس سلبا علي مستقبلها و شخصيتها .
ليست هناك تعليقات
إرسال تعليق