لا تستسلم فالهزيمة لا تليق بك

لا تستسلم فالهزيمة لا تليق بك


لا تستسلم فالهزيمة لا تليق بك

قرارك في انك تكمل في دور الضحية هو اختيار سهل و خالي من اي تعب او تحديات
صحيح انت بتعاني و بتصرخ و بتستغيث طول الوقت ,
لكن في الحقيقة هو دا الاختيار الي انت اختارته عشان ماتتحملش اي مسئوليات و لا تاخد قرارات مصيرية و لا تقوم باي مخاطرة

لكن لما بتقرر انك تتنقل لخانة المجاهد و المعافر و الانسان الي عايز يخلق واقع جديد يشعر فيه بالامان و الاحترام , بتبقي عارف انك بتاخد قرار صعب و له عواقب مش سهلة
جايز الخطوة دي يكون فيها خساير و جايز تتحرم بسببها من كتير من مظاهر الراحة الزائفة الي انت كنت مستخبي وراها

بس انت اخترت انك تواجه
تواجه خوفك 
تواجه عيوبك
 تواجه نفسك
تواجه اي تهديد بيصدر لك الاذي
انت اخترت تسيب لنفسك في الدنيا أثر
اخترت الا تكن مجرد رقم عالهامش

و رغم انك عارف انك هتمشي طريق طويل و مشوار صعب كله ابتلاءات و اختبارات صعبة
لكن الحلم اللي جواك و الامل اللي مالي قلبك , و يقينك بربنا بيسندوك و يقووك و يمنحوك العزيمة علي انك تتغير و تعافر عشان توصل

مفيش سعادة بتيجي بالساهل

النبي عليه الصلاة و السلام قال عن الجنة انها " حُفَّتِ بِالْمَكَارِهِ "
فما بالك بالدنيا اللي الانسان خلق فيها " فِي كَبَدٍ "
الحقيقة اني  لازم اقولك ان دا مش زمن المعجزات 
و لا زمن السلبيين اللي قاعدين يبكوا و يتشكوا من احوالهم و ظروفهم

عمرك هو اغلي ثورة في حياتك  

خسارة تضيعه  في الحجج و البكا عاللي فات و اللي ضاع و اللي راح
بص علي الازمات و الشدائد و لحظات الانكسار اللي في حياتك علي انها دروس تعلمك و تقويك , و تزيدك خبرة و ثقة بالنفس

لو مش هتنشف
لو مش هتشد طولك
لو مش هتتحلي بالشجاعة و الاصرار, عشان تفرض واقع يليق بيك و يناسب احلامك
يبقي هتفضل الي باقي من عمرك محلك سر
هتفضل تعيط و تتشحتف و تتحسر عاللي راح و اللي مش جاي
هتفضل مكمل في هذه الدنيا مجرد صفر علي الهامس

صباحك يقين بالله

هناك تعليق واحد