تتجوز عن حب والا جواز صالونات
في كتابي الاخير GPS ( كيف تعيش سعيدا بعد الزواج )
كان من الهام جدا ان يكون بداية ما نطرحه في الكتاب هو توضيح مفهوم الزواج و فض حالة الاشتباك حول كيفية اختيار شريك الحياة تجنبا لكثير من خيبات الامل و الخلافات مستقبلا
سواء كان الزواج عن طريق علاقة حب ملتهبة ام عن طريق ما يسمي زواج الصالونات
في رأيي انك تتجوز عن حب او صالونات دا مش الفيصل و الا اساس السعادة
طيب ايه اللي بيفرق؟
- اللي بيفرق انت عايز ايه من الجواز
- اللي بيفرق انك تفهم ان الجواز هو مشروع للمشاركة بين طرفين رأس ماله المودة و الرحمة و السكن و المسؤليه
- اللي بيفرق مفهومك اصلا عن الجواز هل هو مشاركة و حب أم تسلط و سيطرة
- اللي بيفرق هو مدي استعدادك لتفهم احتياجات الطرف التاني و تقبل عيوبه قبل مميزاته
- اللي بيفرق الارادة الجادة لخلق حالة من الحوار البناء بشكل يساعد كل طرف في فهم اعمق لاحتياجات الطرف الاخر و متطلباته و احلامه
- اللي بيفرق هو مدي استعدادك لتلبية احتياجات شريك حياتك طبقا لتوقعاته و رغباته وليس تلبية لرغباتك انت
- اللي بيفرق هو اصرارك علي نجاح هذا المشروع و اعتبار ما قد يطفو علي السطح من مشكلات جسورا للبناء والتقارب و ليس النفور و الهدم
و من اجل الحفاظ علي تلك الحالة من الحب و التناغم بين شريكي الحياة
يجب ان تتوافر النقاط التالية لحماية العلاقة و ضمان عبورها لبر الأمان:
اولا: احنا بنعمل تجارة مع ربنا يعني لازم يكون كل واحد مصفي نيته مع ربنا و ناوي خير عشان الجوازة تنجح و العقبات تتسهل
ثانيا: لازم يكون قدرة علي الحوار وان كل واحد يتكلم مع التاني بصراحة بيحب ايه و بيكره ايه و نفسه ايه في شريك حياته دا تجنبا للخرس الزوجي مستقبلا
ثالثا: الجواز يعني امان , يعني تضحية, يعني مساندة, يعني كلمة طيبة , يعني اخلاص, يعني صبر, يعني مشاركة. يعني صرار علي النجاح مع بعض , يعني حنية , يعني تجاوز و نتغافل عن الذلات بعيدا عن التربص و الترصد علي الصغائر
رابعا: كل واحد مسؤل عن التاني و عن سعاته و عن احزانه و عن مشاعره و يكون امين عليها,
لازم يراعيها و ياخد باله منها , لا ان يتركها تدبل بالاهمال الطناش و السلبية و الانشغال
احنا بنتجوز عشان نتبسط و بنخلف عشان نتبسط و بنشتغل عشان نتبسط -
و لو حاجة مما سبق تحولت لاولوية اهم من سعادتنا هتدمر باقي العناصر الاخري
سادسا:لازم نحاول مرة و اتنين و عشرة و نتعلم و نتغير من أجل من نحب
اصعب حاجة ان حياتكم تتحول لمجرد اتنين موظفين بيأدوا واجباتهم بملل و روتين و نقول ادينا عايشين و خلينا نربي العيال و خلاص و اهي عيشة و السلام
لازم كل زوجة و كل زوج يفهموا ان الجواز زي اي شركة فيها شراكة بين طرفين وقد تتعرض لأزمات و ليها منافسين و تحاوطها تهديدات , و لو مش هنقدر ندرس السوق كويس و نطور من أنفسنا و ناخد بالنا من التغيرات الي بتحصل في حياتنا و حوالينا يبقي كدة الشركة دي هتضيع مننا او هنفقد اسهمنا فيها نتيجة الجهل و الاهمال و العناد
احنا بنعيش مرة واحدة و جايز بنتجوز مرة واحدة و ممكن نحب مرة واحدة
يبقي لازم نعيش صح و نتجوز صح و نحب صح عشان الحب بيبان علي وش كل حد فينا و بينعكس علي صحتنا و علي صحة و نفسية اولادنا و علاقاتنا بالي حوالينا و بيخلينا نتحمل في سعادة و اصرار عشان في حد تاني بيكملنا و بيسندنا, عشان نقدر نكمل مهما كانت العقبات و اللازمات
عشان كدة بتشوف علاقات بتبدأ بحالة انجذاب عاطفي شديد لفترة طويلة و تيجي عند الجواز تلقي الانجذاب دا بيموت يوم ورا يوم لحد ما يتحول الاحساس الي كانوا فاكرين انه حب لكره شديد و نفور
و في علاقات الحب بيبدأ مع الجواز زي نبتة صغيرة بتكبر و تنمو مع كل يوم بيمر و مع السنين النبتة بتكبر و تبقي شجرة فروعها كتير بتضلل علي اصحابها و جدورها قوية عميقة تخليها عفية في مواجهة الرياح و الازمات
الخلاصة :
علي كل حال المقياس هو المجهود المبذول من البداية و التفاهم المشترك لانجاح المشروع دا
و بداية المشروع او الحب دا هي حباية بيزرعوها اتنين في الارض و برعايتهم ليها و تعبهم عليها بتكبر و تقوي مع الزمن , و كل ما الايام بتمر الحب دا بيكبر و يزيد
ليست هناك تعليقات
إرسال تعليق