عادات النوم الأكثر سلبية بين المتزوجين

عادات النوم الأكثر سلبية بين المتزوجين



عادات النوم الأكثر سلبية بين المتزوجين

10 عادات مدمرة في غرفة النوم بين الزوجين

عادات النوم الأكثر سلبية بين الزوجين

أوضة النوم 

هي المكان الاخير و الوحيد اللي الزوجين احدهما او كلاهما, ممكن يستمتع فيها بحريته و بعض الخصوصية

هي المكان الي الانسان بيتخلص فيه من تعب الدنيا و همومها في نهاية يوم عصيب , عشان يقدر يواصل من تاني بكرة رحلة يوم جديد من الشقي و التعب

اوضة النوم هي اللي الانسان يقدر فيها يقول اللي يحبه و يلبس اللي يحبه و يعمل اللي يحبه لوحده او مع اللي بيحبه

عشان كدة من واقعي خبراتي كزوج و مشاهداتي كرجل مهتم بالعلاقة بين الزوجين

 احب اوجه لكم النصائح العشر التالية:


أولا: 
لازم نعلم اولادنا من صغرهم ان يحترموا خصوصية والديهم , وان في شئ اسمه حدود شخصية يجب احترامها 
 و ان غرفة نوم الأب و الأم  ليست مكان مستباح للاستيطان او مشاركتهم في النوم بها . و ان دخلوها يحتاج للاستئذان أولا
نصيحة لكثير من الزوجات, مفيش حاجة اسمها ابني متعود يتام جنبي , و زوجي بقاله سنين بينام في أوضة العيال
او اصلي مش بحب حد ينام جنبي و متعودة انام لوحدي
دا اخطر فيروس ممكن يدمر علاقتك بشريك حياتك , عندما يعتاد علي النوم بعيدا عنك


ثانيا: الكنبة الي محطوطة في الاوضة و قدامها تلفزيون دي عشان العيلة تتلم عليها و تشوف المسلسل العربي - دا مش مكانها خالص علي فكرة و بتضرب فكرة الخصوصية في مقتل.  لازم أوضة نومنا تبقي ملكية خاصة لينا , نمارس فيها اوقاتنا الحلوة مع بعض و نبعدها عن كل انتهاك و تعدي 

لمة العيلة و الدفئ الأسري ممكن يكون في مكان تاني بس مش غرفة النوم الخاصة بالزوجين < لكن ممكن يبقي لنا كنبة خاصة او كرسيين قريبين من بعض , نتجمع فيهم كزوجين في وقت لطيف بتاعنا احنا , نحكي و نفضفض و نسمع بعض باهتمام و ود عشان نحسن جودة أوقاتنا المشتركة مع بعض


ثالثا: ممارسة العلاقة الخاصة لازم تكون في رغبة مشتركة ,و تحضير و بهجة , مش عافية و سد خانة و اكراه
تزينك لزوجتك , تزينك لزوجك, الشعف الي بتمارس بيه العلاقة أهم بكتير من انه روتين و لازم يتم في وقت معين و في مكان معين و بطريقة معينة

ضروي و هام جدا , التهيئة النفسية من بدري , من بداية اليوم , اشارات حلوة بسيطة تجذب شريك حياتك و تحببه في اللحظات دي ,  و انك ارغب فيه و متشوق للقاؤه , رسالة موبايل , كلمة مثيرة صباحا , قسط كافي من الراحة
مش لازم يبقي اخر الليل واحنا واقعين من التعب و الاهاق , و تبقي ذكري سلبية في خيالنا

الاستمتاع دا امر تراكمي بيعتمد علي مخزون الذكريات الحلوة المشتركة الزوجين . كتير من الزوجات بتكون ممارسة العلاقة بالنسبة لهن , أمر مقزز او مجهد خالي من الرغبة و لكنه الاضطرار .
اتكلموا , افتحوا قلوبكوا , عبروا عن اللي نفسكم فيه و حابينه , بلاش الاكراه يكون في النقطة دي بالذات


رابعا:  اوضة النوم مش مكان لتخزين الكراكيب و الاشياء عديمة الفائدة, سواء فوق الدولاب او تحت السرير
 الام اللي حاطة التلاجة في اوضة نومها عشان العيال بيلتهموا كل الخيار و الطماطم اللي فيها و عايزة تبقي التلاجة تحت نظرها و اشرافها..  رجاء , شوفي لك مكان تاني , عشان جوزك كدة هايتجوز عليكي قريب

من حقكم تسمتعوا بقليل من الفراغ و الفسحة اقسم بالله , اجعلوا من غرفة النوم المكان المحبب الي قلب كليكما , و ليس مكان رتيب ممل طارد للبهجة و الشغف


خامسا:  في اوربا و الدول المتقدمة,  الناس بيستحموا و يتعطروا و يتزينوا قبل ما يناموا , عشان كدة بيصحوا تاني يوم ,  فريش و مقبلين علي الدنيا مش ضاربين بوز - و معبئين بالسلبية و الاحباط
استحموا-اغسلوا سنانكم-البسوا حاجات جذابة و مبهجة قبل النوم ,  بلاش الكلسون البني المخروم و لا البيجامة النبيتي الي شبه بدلة الاعدام دي يا ام سماح

الملابس المثيرة , الملابس المريحة للبصر , التجمل في نظر شريك حياتك بيجعلك دائما مثير بالنسبة له , لأنه متعود يشوفك في أجمل حالاتك , و القرب منك بهجة و سعادة


سادسا:  بلاش واحنا رايحين ننام , ناخد معانا علي سرير أوضة النوم , البتنجان بتاع غدا بكرة عشان يتقور , و لا الريبورت المطلوب مننا في الشغل عشان نخلصه -دا مش مكانه علي فكرة

بلاش مكالمات طويلة من الأم او الصديقة او زميل العمل و شريك حياتك نايم جنبك , موضوع مزعج و دليل اهمال , ممكن الأمر يتأجل لوقت تاني , احترامك لخصوصية و حميمية المكان المشترك مع شريك الحياة , بيحافظ علي مساحة الشغف و الاقبال علي الحب اللي بين الزوجين

مقال قد يهمك:  كيف تتواصل مع شريك حياتك بدون صدام


سابعا:  بلاش نتمادي و يبقي استخدامنا للموبايل و النت بالساعات - نبقي نايمين جنب بعض و كل واحد في عالم منفصل لوحده عن الاخر

العدو الاكبر للسرير , هو الموبايل , هايشتت تفكيرك و ياخد من طاقتك , و يشغلك عن الاستمتاع بالوقت المتبقي من يوم طويل مجهد , مع شريك حياتك ,  شئ كارثي جدا ان البعض بعد انتهاء العلاقة الحميمة , يهرع  فورا الي مسك الموبايل و التصفح فيه , في حين ان احد افضل فترات المتعة في العلاقة الحميمة و المشبعة للمراة خصوصا , هي فترة ما بعد العلاقة , و اللي جسدها فيها بيفرغ هرمونات الحب و الاطمئنان - و مفيش حاجة هتوجعها غير انها تحس انها مجرد وسيلة فرغت فيها شهوة و سبتها و مشيت من غير ما تحسسها بحبك و امانك 


ثامنا:  ياريت بلاش ننام و في حد شايل في نفسه من التاني و مديله ضهره - اللحظة دي هي أفضل فرصة للصلح و فتح القلوب لبعض و رسم الابتسامة من تاني - 

بلاش أوضة النوم ترتبط ذهنيا جوانا بالخناق و المشاكل , و تبقي مثير طارد للمحبة ,بشكل يجعل البعض يتهرب منها تجنبا للخلاف و الخناق المستمر ,  بلاش تكون اخر حاجة في اليوم بينا هي الزعل و الخصام -لاننا اكيد هانصحي علي مود كئيب و قلوبنا مليانة بالاستياء و الزعل من بعض

شاهد الفيديو التالي:  10 علامات للقاتل الصمات للعلاقات

 شوف علاقتك في اي مرحلة من مراحل الخطر



تاسعا: الجماعة الي عندهم طقوس غريبة في النوم  , زي  الزوج اللي بينام علي بطنه , و الي بيحب يحضن المخدة و الزوجة اللي بتدي جوزها ضهرها و تشخر- انتوا مكانكم محجوز في الجحيم ان شاء الله
لازم تكون في بيننا عادات نوم أكثر قربا و حميمية - الجلد و التلامس موصل جيد جدا للمشاعر, بل يعد لغة حب عظيمة بتوصل اللي في القلوب من غير كلام

اتفقا سويا علي طريقة نوم حلوة تعبر عن القرب و الحميمية و حافظوا عليها و حبوها و خلوها رمز لقربكم من بعض
بلاش النوم اللي كله نفور و جفا , وتبقي بينا مسافات سنين واحنا يادوب جنب بعض


عاشرا: رجاء ياريت نجعل اخر حاجة بيننا  قبل النوم , حاجات حلوة نفتكرها لبعض ,ذكريت جميلة تظل في القلب , لحظات حميمية تقوي مشاعرنا الطيبة تجاه بعض
  • بوسة من القلب و لو علي الراس
  • كلمة حب حلوة
  • كلمة شكر و تقدير
  • دعوة صادقة من القلب
صفي قلبك , نضفه , عبر عن امتنانك لربنا علي نعمه الكتير في حياتك ,جايز في يوم دي تكون اخر حاجة بينكم , خلوها احلي حاجة

فيديو هام جدا للزوجات:

4 كوارث لو عمليتهم .. الرجل هايفقد رغبته فيكي 

هناك 7 تعليقات

  1. بارك الله فيك ا.على كلام من الاخر

    ردحذف
  2. ربنا يبارك فى حضرتك دايما بتوسع مداركنا وتفكيرنا شكرا

    ردحذف
  3. كنت متخيلۃ ان كثر القبلات والاحضان وتلامس البشرۃ بين الزوجين هو لي يجيب الملل ويخليهم يدورو عن شريك جديد لانهم شبعو من بعض وكمان ملابس النوم المثيرۃ يوميا بتخلي الزوج يزهق من مراته ويدور علی وحدۃ تانيۃ لانو شبع من شوفتها خلاص وتعود علی جسمها ودلوقتي مبقتش فاهمۃ حاجۃ صراحۃ يعني لازم نعمل الحجات دول يوميا مش حنزهق من بعض؟

    ردحذف
  4. شكرا لك استاذنا مقال مهم ورسالة توعيه لعمودي الاسره

    ردحذف
    الردود
    1. شكراً لك على المعلومات القيمه

      حذف
  5. نستعيذ بالله من الزوجة النرجسية الكائن الفضائي ، في عالم تاني والبشرية في عالم . هي ليست من فصيلة البني آدميين، متلونة ولا هوية لها... لا تعرف معني السعادة .. والتعاسة بتلاقي فيها نفسها

    ردحذف