امي هاتضيع شقي عمري اعمل ايه؟

أمي هاتضيع شقي عمري اعمل ايه؟

انا عندى مشكله ومحتاج رأيكم فيها
دلوقتى انا عندى شقه فى القاهره وعايش فى امريكا وكنت خاطب قبل السفر ولظروف ما حصلش نصيب و في يوم من الأيام والدتى كلمتنى قالتلى اخوك عايز يتجوز،، فقلتلها وبعدين؟ قالتلى هيقعد فى شقتك فى مصر , انت كده كده عايش بره 

مع العلم ان هو اصلا مش شغال وعايز يتجوز وهما موافقين، والعروسه كمان ،ف قولت اعمل خير ،و وافقت

 يشاء ربنا ان البنت اللى انا كنت خاطبها تكلمنى ونتفاهم مع بعض لان اصلا المشكله كانت مابينا انها مش عايزه تسافر امريكا وحلينا دلوقتى الموضوع ..

الازمه فين دلوقتى

ان امى عماله تقولى لأ، اخوك يأخذ الشقه وانت اكتب الكتاب وخذها امريكا ولما ترجع نبقى نفضيهالك ، وأهل خطيبتى عايزين شقه بنتهم، وحقهم برضه

فانا دلوقتى في حيرة

الموضوع يا أوافق امى وادي الشقة لاخويا و كدة تبوظ جوازتى مع العلم ان الشقه بتاعتى وطلع عينى فيها ٥ سنين

فانا والله تعبت من التفكير هل لو قولت انا عايز الشقه ربنا هيحاسبنى على كده ؟
ولا ده حقى ف المفروض اخذه ؟وبرضه انا مع البنت ، علشان هى شايفه ان الموضوع كده قلة كرامه ليها علشان خطيبة اخويا مش احسن منها .. اعمل ايه ؟؟

........................

 الرد على الرسالة

اعتقد انك انك محتاج ترسم حدود اوضح من كدة في التعامل مع اهلك، حتي لا تصبح حياتك حق مكتسب ليهم

شقتك دي حقك و لا يحق لأحد ان يكرهك علي التصرف فيها بشكل مخالف للشرع او لمصلحتك

دا تعبك و شقاك و ماينفعش اخوك يبني حياته علي سعادتك

امك بتتصرف بشكل متسلط و بتخلق مشاكل بين الاخوات

حافظ علي شقتك و اوعي تقبل بالوضع دا حتي لا يجر خلفه مزيد من التنازلات

ساعد اخوك في جوازه لو ظروفك تسمح و هو محتاج مساعده، دا دورنا في حياة بعض ..التواد و التراحم و السند وقت الحاجة دون افراط او تفريط 

و حافظ علي برك لأمك مهما زعلت او اخدت منك موقف ، في النهاية برها فرض عليك و مسير الايام تهدي قلبها و تفهم انها كانت بتتصرف غلط