بحب راجل متجوز, سابني و رجع لمراته-اعمل ايه عشان ارجعه؟
انا سيده منفصلة عندي 25سنه , اتعرفت علي شخص اكبر مني بحوالي سبع سنين,
بدأت معانا كلام في التليفون واتطورت العلاقه بيننا كان بيحيكي لي علي حد
كلامه ان مراته مقرفه وانه علي طول في بينهم مشاكل وانه لقي معايا السعادة اللي
مفتقدها في جوازه
كان كل يوم بيعلقني بيه اكتر من اليوم اللي قبله, قاللي ان مراته مش
عارفه تخلف تاني وهو بيحب الولاد وقاللي هيتجوزني
اتطورت بيننا العلاقه ولظروف معرفهاش مراته وصلها رقمي وشبه شكت فيا ان
ليا علاقه مع جوزها ,
مره مع مره اتكلمنا وقولت اصاحبها وفعلا صاحبتها وروحت بيتها بس اما روحت
اتصدمت بالحقيقه
لقيتها ست في منتهي الشياكه والاناقه في بيتها عندها ولد وبنتين زي
القمر وفي منتهي النضافه والثقافه
شقه وبيت كانها عروسه جديده وفوق كل ده ست جميله وذات خلق ودين ومتعلمه تعليم
عالي
والمصيبه الاكبر بطنها ادامها اه والله بطنها ادامها ... وخلاص هتولد
الطفل الرابع
والمشاكل اللي كان بيحكي عليها ملقيتهاش موجوده , لقيت قمة في الحب بينهم
واحترام ماشوفتهوش عند حد شايله بيته , واهله كلهم بيحبوها وكانو بيقولو انها
سقف البيت وبابه
حسيت بدوامه وكاني بحلم - فين الراجل اللي حبيته؟ معقول كان بيضحك
عليا؟
من غيرتي وناري قررت أعرف مراته اللي كان بيننا, وكنت بسجله
مكالماتنا مع بعض بعتتها كلها لمراته حاولت افرق بنهم بكل الطرق ماافترقوش
مراته من الصدمه جتلها شبه جلطه ومات طفلها اللي في بطنها , ومازالت لسه معاه
وفي بيتها , وهو سابني وبعد عني وشتمني وفضحني حاولت بكل الطرق اعرفها انه
مبيحبهاش واعرفها وساخته, بس هي مفيش فايده ومعندهاش دم وكل مابعت
تقابلني بالصد
النار مولعه جوا قلبي وهي معاه ولسه معاه ومكمله , مش عارفه انساه وحاسه
انها انتصرت عليا ومموتني اكتر انه فضلها عليا ورماني بقول لنفسي يمكن عشان
تعليم عالي وانا ماخدتش اعداديه
انا موجوعه اوي ومش عارفه انساه ونفسي في اي طريقه ارجعه بيها ليا,
كرهني اوي ونفسي ارجعه يحبني تاني اعمل ايه؟
انا كل ذنبي اني حبيت بجد وعايش مع مراته كانه محصلش حاجه وعرفت انه عايش حياه
مستقره ومراته حامل تاني وهتناقش الماجستير بتاعها ومعيشها ملكه
اكتر من اني سحرتلهم ومفيش فايده ارجعه ليا ازاي انا لسه بحبه وممكن يرجعلي
ويسيب ست الدكتوره علشاني؟
تعليقي علي الحكاية:
الحقيقة اني قابلت كتير جدا من هذه النوعية من المشاكل في استشاراتي الزوجية ,
الزوج اللي بيدخل علي واحدة ست يمثل عليها انه بيحبها و عنده مشاكل مع مراته و
غير سعيد معاها
و كتير جدا بحذر الستات او الفتيات دول انهم لا ينساقوا وراء القصص المفبركة
دي و انهم لازم ياخدوا وقت كافي للتيقن من صحة الكلام دا, خصوصا لما واحد متجوز
يجي يقولك انا مش مبسوط مع مراتي و لقيت سعادتي معاكي
طبعا الزوج هو المسئول الاول عن هذه الكارثة , لما فتح الباب للشيطان يدخل و
يعشش في بيته
و الحقيقة وضحت ان مراته ست فاضلة بتعمل كل ما في وسعها عشان تسعده و تحافظ
علي بيتها, لكن تعبها دا قوبل من طرفه بالخيانة و الكدب و التشويه
لصورتها
طبعا صاحبة الحكاية واضح جدا انها شخصية غير سوية و عندها مشاكل كبيرة في
مفهوم القيم و معني الرضا
الغيرة اللي كلت لقبها دي عمتها و خلتها تتصرف بشكل طائش و غير محسوب
حب السيطرة و التملك دا لا يسمي حب , هي بس نار الغيرة و الانانية اللي جواكي
هم اللي بيحركوا تلك السيدة
الطمع هو عنوان الحكاية دي
طمع الزوج اليل مش راضي بكل النعم اللي ربنا انعم بيها عليه , من بيت و اسرة و
اولاد و زوجة صالحة , و مع ذلك طماع و خاين
طمع السيدة صاحبة الرسالة اللي الله اعلم زواجها الاول انتهي ليه و ازاي . و
ايه الاثار النفسية اللي تركه فيها او اللي تربيتها تركته في شخصيتها الغير
سوية دي
طمعها لما عرفت حقيقة الزوج الخائن دا , و مع ذلك اصرت تكمل و تهدم البيت
بالغيرة و السحر و الجشع
ليست هناك تعليقات
إرسال تعليق