ضربت مراتي بالقلم ساعة شيطان و هي طالبة الطلاق - اعمل ايه؟
مراتى غضبانة عشان اتخانقنا وضربتها بالقلم ويشهد ربنا أنة ضربة قلم بسيطة بس والله
رفعت عليا قضية للطلاق, و روحت أنا وأخوىا الكبير لأهلها أكثر من
مرة عشان نصالحها , لكن هم بيقولوا احنا مش ممانعين و اهي عندكم اهي
كلموها لو وافقت خدوها وانتم مروحين
و كل ما احاول اكلمها ترفض وعملتلى بلوك مكالمات وفيس وواتس
روحت لها شغلها ووصلتها للبيت وكلمتها و اعتذرت لها , تقولى سبنى افكر وبعدين بردة تقول الطلاق و احنا عندنا بنتين, كلمت صاحبتها القريبة منها , رفضت وصاحبتها بلغتنى انى هى مش هتدخل فى الموضوع دا عشان هتخسرها للابد
طيب هل الخلاف دا يستاهل الزعل دا كله وبعدين احنا عندنا بنتين لسة سبع سنين وأربع سنين , يرضي مين يتيتموا كدا وابوهم وأمهم عايشين علي وش الدنيا
انا عارف اني غلطان و اتسرعت , بس هي مش مدياني فرصة اصلح غلطي
يشهد ربنا أن أنا مش عايز اوصل للطلاق لكن هى واهلها موقفهم سلبي
كدا
عمل اية بصراحة مش عارف
يارب الصبر من عندك والحل كمان من عندك
تعليقي علي القصة دي:
الحقيقة ان الضرب و العنف اللفظي و الجسدي مرفوض تماما في العلاقات و غير مناسب لادارة الوقات الخلاف , لانه يزيد الامور تعقيدا و اشتعالا و بيتحول في حد ذاته لمشكلة جديدة زي اللي في الحكاية دي
الحقيقة ان مسألة ان الزوجة تسامح علي تعرضها للضرب من شريك حياتها دي مسألة نسبية و تختلف من ست للتانية, حسب طبيعة شخصية كل ست و حدودها الشخصية
كمان الامر بيعتمد علي رصيدك عندها من المودة و الاحترام و الاخلاص , و هل انت بالاساس شخص غير عنيف و دا موقف عابر نتيجة ضغوط معينة و الا دا سلوبك المعتاد في التعبير عن غضبك
ممكن تكون اخدت الموقف دا بعد صبر و تحمل كتير و جابت اخر قدرتها علي الصبر و , بقي القلم البسيط دا القشة اللي قسمت ظهر البعير , الكلام كدة مش موضح تفاصيل حوالين تاريخ العلاقة و كيفية ادارة الخلافات فيها
كمان شخصية الزوجة بتفرق في الامر دا , هل هي الست اللي هتعتبر الموقف دا خط احمر تبني عليه للي جاي عشان ماتيكررش تاني و هايبقي مسامحتها ليك مشروطة باحترامك ليها و عدم تكرار الامر و تحمل عواقبه مستقبلاطيب هل هي ست سيئة النية و دفعتك لدا عشان تستغله ضدك و تبقي فرصة لابتزازك نفسيا و عاطفيا تحت وطأة تمسكك بيها و خوفك علي بيتك و عيالك
طيب هل هي ست ضعيفة الشخصية و ماشية ورا كلام اهلها و مفيش حد عاقل و كبير يحل
الامر
موقف الاهل كمان عامل مهم جدا في رأب اي صدع يحدث للعلاقات الزوجية , ممكن
يكون عامل ايجابي بالتدخل العاقل الرشيد , و ممكن يكون عامل سلبي بالتلاعب و
تضارب المصالح و استغلال الامر بشكل سلبي
اعتقد الموضوع دا مايتحلش كدة في رسالة مختصرة كدة علي السوشيال ميديا , لأن كل واحد هايفتي لك حسب مصلحته و هواه و موقفه من الزواج و من الجنس الاخر بشكل عام بدون ما يكون فاهم طبيعة و خصوصية علاقتك بمراتك , لان كل علاقة و لها خصوصيتها و طبيعتها
و انك محتاج تتواصل مع شخص متخصص في حل امور الخلافات الزوجية لاستشارته في الامر , و الاجابة علي النقاط اللي تم ذكرها دي لانها هتفرق جدا في مستقبل هذه العلاقة , خصوصا لو الزوجة في حالة غضب و حزن من الموقف و محتاجة وقت تتعافي فيه نفسيا و تراجع نفسها , و تبقي فرصة كويسة لو الشخص المتخصص دا كان له دور في انه يسمع منها و يفهم حقيقة مشاعرها و علي اي أساس بنت موقفها دا , و لو في فرصة للعودة يقدر يساعدكم من اجل تعلم فن ادارة الخلاف , لتفادي مش هذه الاخطاء مستقبلا.
ليست هناك تعليقات
إرسال تعليق