زوجي علي علاقة بطليقته - ماذا افعل؟
أنا امرأه متزوجة من ست سنين تزوجت رجل مطلق وأنا كنت أنسة , وعندي منه
ولدين حاليا
انا بحب زوجي جدا بس مش بحس إن بيبادلني نفس الحب
, دايما ضرب وإهانة بالأب والأم والأهل وألفاظ خارجة رغم إن مستواه
التعليمي عالي
من بعد زواجنا بفترة بسيطة جدا أكتشفت إنه على علاقة
دائمة بطليقته هو عنده منها أولاد وماينفعش يرجعها غير لو إتجوزت رجل
غيره
المهم أكتشفت من خلال تفتيشي في موبايله إنه بيكلمها دايما والكلام مش بخصوص ولادهم ...الكلام بينهم مش كويس وكلام رومانسي وممكن يحصل تجاوز في الكلام بينهم وساعات بتكلمه فيديو كول
أكتر من مرة أصعد المشكلة وتوصل للطلاق وبيرفض يطلق وأنا خايفة أخد قرار
الطلاق خايفة على ولادي وخايفة من المسؤولية وجوايا بحبه لسه , بس دايما بلاقي
اسلوبه جاف معايا بفضل أقوله كلام حلو, بيحسسني إنه ملوش في الرومانسية. و مع ذلك الاقيه بيكلمها كلام حلو ورومانسي رغم إنهم وهما متجوزين مكانش بينهم وفاق
والأمور وصلت للمحاكم
حتى بعد ما طلقها قعدوا سنين ف مشاكل قبل ما يتجوزني
وأول ما اتجوز, هي اتبدلت وبقيت تتعامل معاه بطريقة ماترضيش ربنا , وهو
حاساه مستمتع بإنها بتحاول ترجعه تاني ومستمتع بإنه مرغوب فيه منها بعد رفضها
ليه
سؤالي الحل ايه مع الزوج الخاين و المهمل اللي زي زوجي؟
أكمل علشان ولادي يتربوا مع أبوهم بس أنا قلبي مكسور خصوصاً إني كنت متمسكة بيه وماكنتش شايفة إن يعيبه إنه مطلق و وافقت عليه
أنا عايشة معاه في شك وقلق وإهانة وخوف ومش عارفه الحل ايه
الرد علي الرسالة:
لو جوزك بيخونك او متجوز عليكي في السر او بيمارس ضدك اي اعتداء جسدي او
لفظي
مش مكفي احتياجاتك المادية او العاطفية
و حضرتك رافضة و متأذية من الوضع دا
محدش هيعرف يجاوبك علي السؤال دا غيرك انتي
اتطلق و الا اكمل معاه ؟
انتي ادري حد بظروفك و امكانياتك و أولوياتك و قدرتك علي التحمل ايه هي خطوطك الحمرا و معتقداتككل واحد له حدوده و طاقته في التحمل
سواء هتكملي او تنفصلي لازم تكوني واعية و دارسة قرارك كويس و قادرة علي تحمل تبعاته و شايفة نفسك في المرحلة اللى تلي القرار دا
قرارك لازم يكون نابع من ارادتك و اقتناعك
انتي ادري واحدة برد فعل جوزك و موقفه
فكرة الغصب و التضرر او التسرع و التهور مش في مصلحتك
ان حد يوزك و يفتي لك من غير ما يعرف تفاصيل حياتك بكل جوانبها و لا يعرف وجهة
نظر الطرف التاني برده مش في مصلحتك
بس لو خدتي قرارك لازم تتحملي نتائجه من غير عياط و لا شحتفة و بؤس او تجبر و
افترا و تهويل
خراب البيوت و تشريد اسرة مش سهل
كمان تحمل الذل و الهوان و كسرة النفس مش سهلة
اللي عايز بس الفت نظرك ليه , ان من أمن العقاب اساء التصرف , يعني متعود يضربك و يشتمك و يهينك بكل وسيلة و مستغربة انه بيخونك ؟
حاولي انك تحلي مشكلتك الاول مع روحك و تعالجي مشكلة حدودك الدايبة اللي مسببة ليكي المهانة و الاذي
و زوجك واضح انه راجل غير مسئول و لا يعرف كيف يحمي بيته سواء كان في علاقته الاولي او في علاقته بكي , و النتيجة انه ماشي خلف هواه و فاتح للشيطان باب
مصيرك... قرارك
ليست هناك تعليقات
إرسال تعليق