انا مليش في الجواز و كنت عايزة اخلف زي اخواتي و دلوقتي عايزة اتطلق
أنا عندي 25 سنه وكنت مش في دماغي الجواز نهائي بس كان نفسي يبقي عندي أطفال زي
أخواتي الصراحه
اتقدملي عريس محترم ومقتدر و الحمدلله فيه كل المواصفات, اتخطبنا
فتره وكنت بدعي تعدي على خير والحمدلله اتجوزت ...
ولكن أنا من الآخر كنت بجبر نفسي عليه , وأنا كده كده مليش في الجواز و العلاقه, أوأنه يبقي في راجل في حياتي عموماً ومبطقش حتى أسمع صوت خاصاً بعد الزواج , بس عايزه اخلف وبس
وبعد الجواز بشهر ونص تقريبا حملت وطبعا كنت مبسوطه جدا وهو كمان وكنت يتحجج
بالحمل وطلبت منه اروح لأهلي لأني تعبانه وكده وأنا حرفياً كنت بعمل كده علشان
مش متقبلاه
وفضلت هناك لغايه ماخلفت وهو كان بيحاول يرجعني البيت وأنا برفض فكان بيجي
يزورني ويجبلي طلباتي وهدايا وبيحاول يضحك عليا علشان ارجع
الحمدلله الفتره عدت وولدت ورجعت البيت بعد الولادة بشهرين, ولكن ماكنتش
بطيقه ومبعرفش اتعامل معاه وهو حتي كان مش بيحاول بس أنا مش عارفه افاتحه إزاي
في الموضوع وافهمه
هو حس أني زعلانه بس فكرني اني زعلانه علشان خلفت, فبدات اخد حبوب منع
الحمل مع الدكتور بس حسيت إني هضيع وقت الصراحه وأنا مش طايقاه وعايزا أطلق ومش
عارفه اعمل ايه
وقفت الحبوب وبعدها حملت على طول وهو اتفاجي وكشفنا والدكتوره قالته أن الحبوب
ممكن يحصل معاه حمل
ارتضي بالأمر وأنا بعدها بشهرين رجعت بيت أهلي لأني تعبت المره دي في الحمل
وفضلت هناك لغايه ما ولدت
وهو عايزني ارجع وأنا الصراحه مش طايقاه وخلاص مش عايزه أرجع
وبصراحة انا عايزه طريقه محترمه أفهمه بيها أني عايزه انفصل واخد حقوقي لأني الصراحه خايفه ياخد حاجتي وأنا من حقي الشقه ومؤخري كبير ومش عايزه أتنازل وأنا عارفه أنه محترم وكل حاجه بس أنا مش طايقاه
تعليقي علي الحكاية:
الحكاية دي انا شفتها علي احدي صفحات التواصل الاجتماعي , و بصراحة حسيت ببتعاطف كبير مع الزوج المخدوع , اللي نصيبه وقعه في زوجة انانية بالشكل دا و مش شايفة غير نفسها و بس
فكرة ان علاقة الزوج تقوم بدون اهم ضلع في اضلاع مقومات نجاحها , و هو ضلع
المصارحة و الثقة ,
انك ترتبط بانسان يبقي مخبي عليك الي في نيته و ضميره , و بيلففك حوالين نفسك
و انت مش عارف الحقيقة فين او قصرت في ايه
انه حتي يحرمك من حقك في قبول او رفض منطقه الشاذ دا في الحياة و يخبي عليك
خطته و يستخدمك فقط لتحقيق غرضه , بعدين يفكر ازاي يرميك من غير ما
يخسر
منطق في منتهي الجحود و الانانية , و للاسف مش بس الزوج هو اللي هياخسر ,
الاطفال الصغيرين دول كمان هايخسروا خسارة فادحة , لما انسانة انانية زي دي هي
تكون امهم و هي الي هاتربيهم
و لو هايبقي ليا اي فرصة اني اقدم نصيحة للست زي :
هقولها اتقي الله في زوجك و اولادك , و بلاش السكينة تسرقك و فوقي قبل فوات الاوان , كفاية ظلم للرجل اللي اتظلم في الاول و دلوقتي عايزة برده تظلميه بالكدب و الغش لانك بكدة مثال حي للزوجة الانانية الغشاشة
احترمي حتي انه صانك في بيته و ماشفتيش منه حاجة وحشة , و لو مش قادرة تكملي معاه , صارحيه و بلاش تحمليه ما لا يطيق , و اتحملي نتيجة غلطك , و ربي عيالك بالحق و بالمعروف
ليست هناك تعليقات
إرسال تعليق