محتاجة راجل يسندي و يعوضني بعد طلاقي
انا سيدة منفصلة بقالي سنتين وعندي بنت ١٥سنة و ابني١٣سنة, وموظفة.
الحمد لله فتره طلاقي كانت فتره صعبه جدا بعد جوازي اللي استمر 17 سنة وكان ممكن اكمل جوازي زي اي زوجة في هدوء و استقرار , لكن دخول أمه في كل شيء ف حياتنا دمرها , بس الحق العيب مش عندها .
هيا ست مسيطرة وهو كان الكبير والقريب لقلبها وكل هفوه كان بيحكيلها عليها ,
حريفا كل ما اتتخيلوه كان بينقله ليها يوميا اليوم بيومه
كانت مدتخله في لبسي , شغلي , ف مرتبي. ف اكلي, فس كل تصرفاتي وهو يقولي
دي ماما عادي حقها تعرف كل شئ
المهم زادت الخلافات بيني وبينها, و للأسف حكمت حكمها الأخير " طلقها يا كده.. يا متبقاش ابني " .. فلحظه طلقني و حتي الأولاد مابيسيألش عليهم بأمر منها..
عدا سنتين ومسئوليه أولادي زادت عليا وتعبت ومحتاجه راجل جمبي يساعدني ماديا ونفسيا , وتربيه الاولاد في سن مش عرفه اتعامل معاهم , سلوكهم اتغير وانا الزمام هيفلت مني وفي نفس الوقت بشتغل عشان اصرف عليهم .
فرحة ما كلمت
اتعرفت على رجل ارمل معاه ٣ اولاد , ورسم لي حياه و ردية وقالي انا معايا فلوس ومبسوط وصاحب محلات.. و بعد ما اتعرفنا على بعض كويس , اكتشفت انه بيكلم بنات على الفيس ومفلس ومابيكسفش طلب مني ١٠٠٠جنيه وجبتهاله بالسلف ولا اكني جبتله شي...
فضل يبكي وقالي سامحيني مش هتتكرر تاتي , ولله بحبك وانا شفت دموعه صدقته..
فعلا هو بيحبني حساه حبه صادق.. وعرفني على أهله و أولاده وماماته كلمتني
وقالتلي ولله ابني بيحبك وكلام كتير...
بس للي محيرني بقي ظروفه
قالي هقعد في شقتك , عشان شغله بعد كورونا الدنيا وقافة, يعني الاعتماد
هيكون عليا انا. وغير بدل ما كنا ٣ أفراد انا واولادي , هربي ٥ اولاد وابوهم
ومسئوليه. وف شقتي.. وبيقولي هكون اب لاولادك ونبقي مع ببعض..
كنت اتمنى اللي يشيل عني ويقعدني ويصرف عليا مش انا للي اشيله.. بحس بصراحه هو
بيحبني مجرد احساس..
محتاجة رااجل يساندني بس عقلي راافض وقلبي بيقولي اهو راجل وبيحبك وخلاص اعمل ايه؟
تعليقي علي الحكاية
الاحتياج زي الكيف بالظبط.. بيذل و بيعمي صاحبه و بيخليه ضعيف مكسور.
ماتزعليش مني , انا متفهم صعوبة مسئولية اولادك و الضغوط الكتير اللي عليكي ..
بس السبب الرئيسي هو احتياجك العاطفي مش احتياجك للسند و مشاركة
المسئولية
و دا مش عيب , و حقك جدا , بعد الخذلان اللي شفتيه من طليقك و تدخل امه في حياتك. لكن مهم بينك و بين نفسك تحددي انتي عايزة ايه الأول , و بشفافية شديدة تبقي عارفة ايه اللي مناسب ليكي و ايه اللي مش مناسب , محدش هايلومك لما تبقي محتاجة راجل في حياتك . بس هدفك يبقي واضح قصاد روحك
لكن لما تختاري راجل يروي عطشك للحب و يشحن طاقة قلبك عشان تكملي حياتك الصعبة دي . اختاري راجل بجد مش شخص مخادع كداب استغلالي , قادر يشوف نقاط ضعفك كويس و يلعب عليها بالعياط و المسكنة .يعني بدل ما هاتشيلي حمل عيلين , هايتشيلي لوحدك حمل 6 عيال , علي اعتبار ان الشخص دا عيل زيادة بمشاكله و انتي اصلا مش ناقصة
ياريت تفوقي قبل ما تغرزي رجليكي في الرمل اكتر من كدة , و بلاش الضعف دا يعميكي عن الحقيقة اللي واضحة زي الشمس , انه راجل طماع و هايتعبك اكتر و هايزود مشاكلك اكتر و انتي مش ناقصة
صدقيني هو الصوت اللي جواكي بيعزز جواكي شعور الوحدة و الاحتياج هو اللي مخليكي مصدقة انك مش هاتقدري تكملي من غير راجل , و خدي بالك ان اولادك في سن مراهقة و مش سهل تلاقي حد يتوافق مع طباعهم .. الاهم في المرحلة دي انك توفقي اوضاعك و تحسني من نفسيتك بأنشطة الرعاية الذاتية اللي ترجع لك التوازن و الثقة بالنفس.
في النهاية مش عاوز اكون قاسي عليكي , بس مش عاوز عيالك يتظلموا مرتين بدون ذنب , مرة بسبب ابوهم اللي تخلي عنهم , و مرة بسبب ضعفك و احتياجك اللي ممكن يغرقهم و يغرقك..
قربي من اولادك و صاحبيهم و بلاش تنظري لهم علي انهم حمل تقيل .. وأسألي الله الثبات و هيعوضك خير
ليست هناك تعليقات
إرسال تعليق