طلقت مراتي و لسة بحبها و مش عارف اردها .. اعمل ايه؟

طلقت مراتي و لسة بحبها و مش عارف اردها .. اعمل ايه؟

انا اتجوزت سني صغير و مراتي كانت اصغر مني ب 3 سنين عشنا مع بعض 5 سنين زي الفل الناس كانت بتحسدنا على عيشتنا 

راجل محترم ابن ناس بيشتغل شغلانه حلوه و بنت جميله و متعلمه و بنت ناس و مستوي مادي فوق المتوسط و بيت هادي مفيهوش اي مشاكل و علاقه طيبه
هي كانت من محافظه و انا من محافظه تاني و صله الرحم مع اهالينا كانت ممتازه و علاقتنا باهالي بعض كانت كويسه و علاقه اهالينا ببعض كانت ممتازه جدا الحمد لله

و بعد 3 سنين ربنا رزقنا بولد زي القمر .لحد ما حصل مشكله هايفه بينا انها كانت عايزه تقضي العيد مع مامتها و الطبيعي اننا نقضيه سوا انا ادايقت و قولتلها طالما مامتك اهم خليكي عندها و ما اتكلمناش لمده 6 شهور كامله لا اعرف عنها حاجة و لا عن الولد
ابتديت اروح ارجعها بعد ما حسيت بالوحده و ببعدهم عني , و الطبيعي و الاصول ان الرجوع يتم عن طريق اني اروح و اتكلم مع اهلها 

عملت كده فعلا بس امها ماوافقتش انها ترجع و قالتلي بالنص انا بنتي مش مرتاحه معاك و في مشكله بينكو لازم تتحل 

سنتين كاملين و انا بدور على المشكله ده مش لاقيها و اكلمها هي لوحدهاتقولي معرفش و اتكلم مع اهلها يقولولي منعرفش شوف انت لحد ما قولت اني هطلق قالولي اصلك ملبوس بجنيه و عايزه تفرق بينكو
روحنا ل 2 شيوخ و قالو مفيش حاجة مراتك دماغها مليانه من ناحيتك بس

و لما حسيت ان مفيش امل ان الوضع يتغير طلقت و خليتها اخدت كل حقوقها حتي الزيادات و ما اعترضتش على اي حاجة
بعدت عنها خالص لمده سنه و نص و كان اخري اروح لمحافظتها اشوف الولد و اديلو مصروفو و امشي
الي بيسالني طلقت ليه اقولو مفيش نصيب مع اني لحد دلوقتي مش عارف السبب ايه
المشكله هنا اني بعد سنتين طلاق و محاولات مني اني ارتبط تاني و افتح بيت تاني اني مش قادر ما افكرش فيها كل بنت بتعدي قدامي بحسها هي مش شايف غيرها بحبها جدا جدا و لو رجع بيا الزمن هختارها هي

اتكلمت معاها و واجهتها و بالرغم من ان شفايفها نطقت ان مفيش بينا حاجة غير الولد الا اني شفت في عنيها حب كبير حاسس انها عايزاني بس في حاجه منعاها
اتقدملها ناس كتير و هي بترفض و بيضغط عليها من امها و بترفض
مش عارف اعيش و حياتي واقفه عليها و هي مطفيه مش ده مراتي الي كانت معايا و الي كانت الدنيا كلها بتنور بوجودها في المكان
حاسس ان في حاجة غريبه شايف في عنيها حب و في كلامها و تصرفتها اننا نبعد

عايز اقولها اني بحبها قوي و ان حياتي مدمره من غيرها و اني مستعد اعمل اي حاجة بس تبقي في حضني تاني مقدرتش اخلي حد يا خد مكانك لانه مافضيش مش قادر اقول انك طليقتي انت في نظري مراتي ام ابني الي وعيت على الدنيا بيها الي كانت منوراني و مخلياني حابب الحياه ولو الزمن اتعاد بيا هختارك تاني و لو عشت عمري كلي بالشكل ده قصاد نظره حب منك انا مستعد انا مش شايف حد غيرك انا معرفش حد غيرك و مش عايز اعرف كفايه عليا اني اشوفك كويسه و اطمن عليكي كفايه عليا اني بشم ريحتك في ابننا لما بقابله

لو في حاجة منعاكي ترجعي انا كفيل بيها , انا كفيل اني اصلح اي حاجة ممكن تبوظ بسبب رجوعنا و انت جنبي انا قوي و انتي بعيده انا ضعيف طول عمرك كنتي سر قوتي و نقطه ضعفي
و حياه الي ما بنا فكري في الرجوع و فكري في حد حبك و مش شايف غيرك

تعليقي علي المشكلة دي :

اوقات كتير اوي مش بنحس بقيمة الاشياء غير لما نفقدها , و للاسف لما بنفوق بتكون حاجات كتير اتغيرت و صعب ترجع زي الأول 

اوقات كتير مش بيكون عندنا الارادة الكافية اننا نحمي حبنا و نامن علاقتنا , و بنسيبها فريسة سهلة للظروف و الخلافات التافهة تفترسها و احنا واقفين نترفج عليها

شفت علاقات كتير , اطرافها ظروفهم المادية و الاجتماعية حلوة و ميسرة , و كتير منهم بيكون بينهم حب كبير , لكن للأسف بيسيبوا الخلافات البسيطة و الامور التافهة تكبر و تتراكم و تهمل سدد في شرايين العلاقة , و للاسف بنفوق بعد فوات الاوان
انا شوفت المشكلة دي في احدي صفحات التواصل الاجتماعي , و حبيت اعرضها لكم انهاردة عشان يكون تكون جرس انذار لكتير من الازواج و الزوجات اللي بيتعاملوا مع علاقات زواجهم  برعونة و عدم مسئولية , بياخدهم تيار الانانية و الكبر و التساهل لبعيد عن بر الامان , و بعدين مع هول الصدمة بيرجعوا يبكوا و يصرخوا باحيثين عن حل و طوق للنجاه

انت لسة علي البر , خد الامر بجدية و لا يسحبك تيار التهاون الي منطقة الخطر , مازالت هناك فرصة للحل و ربأ الصدع