انا متجوزة في بيت عيلة و اهل جوزي مش عايزيني اعرف عنهم حاجة

انا متجوزة في بيت عيلة و اهل جوزي مش عايزيني اعرف عنهم حاجة

انا متزوجه فى بيت عيله حماتى وحمايا وبنتها مع بعض تحت واحنا فى بيت فوقهم ، الاول كنت بنزل لها وعادى , ولكن كنت بلاحظ ان فيه اماكن فى البيت بتحرم على دخولها زى اوضتها واوضه اخت جوزى وتقبلت الموضوع ، بعد كده بدأت تقول لى جوزك اولى بوقتك اطلعى ارتاحى وكأنها بتوزعنى مره هى تقول ومره بنتها تقول .

لما بتعارك مع جوزى كنت بحكى لها وتقول ربنا يهدى ولا بتكلمه ولا حاجه
لحد ما فى مره قالت لى بص بقى انا عاوزه اكمل الباقى لى فى الحياه بهدوء لا عاوزه اعرف عنكم حاجه ولا عاوزه وجع دماغ ، صفوا حواديتكم دى بعيد عنى،
وبرضه اما احكى لبنتها ترد على الرد ده - انا عاوزه اعرف عنكم الحلو لكن الخناقات حلوها بعيد عنا.

اتعركت عاركه جامده معاه لانهم عازلين عنى خالص,  يعنى على قد الكلام الخفيف وكأنى ضيف، اه بيعاملونى حلو وبيحبوا عيالى جدا لكن انا على قد قصر الكلام .. براويين يعنى .

غضبت عند اهلى , وابويا قال له تجيب ابوك وتيجى،
ابوه كلم ابويا وقال له انا جوزت بنتكم لراجل الكلام معاه هو لا قاصر ولا عيل فى حضانه يجيب ولى امره .

انا مصره ان ابوه وامه واخته كمان ييجوا , والا اتطلق 
وهو بيقول لى باللفظ كده اتلمى وطلعيهم من دماغك وانا ما غلطتش فيكى وزى ما خرجتى ارجعى
انتي عاوزه تتداخلى معاهم وانا اهلى بيحبوا الحدود واياكي تتدخلى تانى فى حياتهم

هو انا كده بتدخل ؟ اخته اتخطبت ولا حكوا قدامى عن اى حاجه ولا اتفاقات ولا عرفت اى حاجه ولا جوزى بيحكى لى ... ما انا من العيله ليه بيعاملونى على انى غريبه .
حماتى بعدم مجيها هى وجوزها وبنتها هيبقوا بيخربوا بيتى وهيخلونى اتطلق،
مين فينا الصح ؟

تعليقي علي الحكاية :

مفيش اسوأ من ان الانسان يبقي عدو نفسه و تمسلط علي حياته
دبور بيزن باصرار علي خراب عشه و هدم سعادته بايديه

جايز الناس يكونوا مزودينها شوية او مش عارفين يحتووكي في حياتهم بالشكل اللي تحبيه
بس في الاخر دي حدودهم الشخصية , و عليكي احترامها و تقبلها و التعامل معاها 
طالما محدش بيسبب لك الاذي او بيتدخل في حياتك 

يعني انتي من الحالات القليلة اللي عايشين في بيت عيلة بيتمتعوا بالخصوصية و الحرية بدون تسلط او تدخل في حياتك الشخصية من أهل البيت , و محدش بيدوس لك علي طرف او بيتعدي لك علي طرف 

اتعلمي ان في حاجة اسمها حدود شخصية , لينا و للاخرين , علينا اننا نحترمها و ندعمها  طالما محدش بينتهك الحدود دي او بيتعدي عليها

محدش بياخد كل حاجة , احمدي ربنا علي النعمة اللي انتي فيها و عيشي و استمتعي بحياتك انتي و جوزك و اولادك و بلاش عقلك ياخدك لسكة الخراب

حكاية قد تهمك:

صديقتي خطفت زوجي